Google Maps Error: Woman’s Car Falls Into Creek in Belapur
नवी मुंबई (शुक्रवार): गुगल मॅपवर दाखवलेला रस्ता बरोबर आहे, या विश्वासामुळे अनेक वेळा वाहनचालकांना धोका पत्करावा लागतो. असाच एक धक्कादायक प्रकार नवी मुंबईत घडला आहे, ज्यात एका महिलेची कार थेट खाडीत कोसळली.
गुरुवारी मध्यरात्री, म्हणजे शुक्रवारी पहाटे सुमारे १ वाजता, एक महिला आपल्या कारने उलवेच्या दिशेने जात होती. बेलापूरमधील खाडीपुलावरून जायचे असताना गुगल मॅपवर दिसणाऱ्या मार्गावर विश्वास ठेवून त्या पुलाखालील रस्त्याने गेल्या. मात्र तो रस्ता जेट्टीवर जात असल्याचं त्यांना माहित नव्हतं.
जेट्टीच्या टोकाला कोणताही सुरक्षा कठडा नसल्याने, गाडी थेट ध्रुवतारा जेट्टीवरून खाडीत कोसळली. सुदैवाने महिला बचावल्या असून त्यांना तात्काळ रुग्णालयात दाखल करण्यात आलं आहे.
ही घटना पुन्हा एकदा दाखवून देते की डिजिटल तंत्रज्ञानावर संपूर्ण अवलंबून राहणं किती धोकादायक ठरू शकतं. ज्या ठिकाणी प्रत्यक्ष पाहणी किंवा रस्त्यांची माहिती नाही, तिथे गुगल मॅपवरील मार्ग तपासूनच निर्णय घेणे गरजेचे आहे.
स्थानिक प्रशासन आणि पोलीस घटनास्थळी दाखल झाले असून, जेट्टीवर सुरक्षिततेच्या दृष्टीने कठडा नसल्याबद्दल विचारणा सुरू झाली आहे. नागरिकांनीही यावर तीव्र नाराजी व्यक्त केली आहे.
