जिममध्ये व्यायामादरम्यान तरुणाचा मृत्यू; सर्व घटना सीसीटीव्हीत कैद
पुणे : चिंचवडगाव येथील नायट्रो जिममध्ये व्यायाम करत असताना मिलिंद कुलकर्णी या ३५ वर्षीय तरुणाचा दुर्दैवी मृत्यू झाला आहे. ही घटना परिसरात खळबळ उडवणारी ठरली असून, संपूर्ण घटना जिममधील सीसीटीव्ही कॅमेऱ्यात कैद झाली आहे.
मिळालेल्या माहितीनुसार, मिलिंद कुलकर्णी हे नियमितपणे जिमला जात होते. नेहमीप्रमाणे जिममध्ये व्यायाम करत असताना त्यांना अचानक भोवळ आली आणि ते जागेवरच कोसळले.
त्यानंतर तात्काळ रुग्णालयात त्यांना दाखल करण्यात आले. मात्र उपचार सुरू होण्यापूर्वीच डॉक्टरांनी त्यांना मृत घोषित केले.
प्राथमिक तपासणीनुसार, हृदयविकाराचा तीव्र झटका हे मृत्यूचं कारण असल्याचा अंदाज डॉक्टरांनी व्यक्त केला आहे.
ही घटना जिममध्ये आरोग्य तपासणी आणि योग्य मार्गदर्शनाचे महत्त्व पुन्हा अधोरेखित करते.
जवळच्यांनी आणि मित्रपरिवाराने या घटनेनंतर दुःख व्यक्त केलं असून, परिसरात हळहळ व्यक्त केली जात आहे.
